БОДОЛ ШИГ ӨДРҮҮД

Хэзээ ч билээ зүүдэлсэн

сайхан зүүд шиг санагдах

Хэлхээ мянган өдрүүдийг

инээмсэглэн угтана би

Уулзсан хүмүн бүхнийхээ

сэтгэлийн сайхнаар гэрэлтэж

Учралын энэ л хорвоодоо

аз жаргалаа бүтээнэ би

Бороон дуслууд

үсний минь ширхгийг

тоолон сувдарна

Бодол шиг өдрүүд,

бодол шиг өдрүүд

ирж буцна аа

Хаана ч билээ бүтээсэн

ариун сүм шиг бодогдох

Хатан зүрхний нутагтаа

ихэмсэгхэн алхана би

Шувууны өндгийг сүүдэрлэхгүй

хайрлахын учрыг ухаарч

Шуугиант энэ л замбуудаа

нэг л дураараа амьдарна би

Бороон дуслууд

үсний минь ширхгийг

тоолон сувдарна

Бодол шиг өдрүүд,

бодол шиг өдрүүд

ирж буцна аа

Хэнээс ч билээ сонссон

эртний үлгэр хөврөх шиг

Хэтэрхий баялаг түүхийг

үргэлжлүүлэн амьдарна би

Есөн хүслээ бүтээхийн

гэгээн мөрөөдөлд умбаж

Ерөөлтэй энэ л орчлондоо

хэн нэгнийг хүлээнэ би

Бороон дуслууд

үсний минь ширхгийг

тоолон сувдарна

Бодол шиг өдрүүд,

 бодол шиг өдрүүд

ирж буцна аа